Ikkje gløym motkulturane!

For å setja eit punktum ved namnedebatten, har eg no redigert innlegget mitt ein smule. For du har jo rett, Monika - er ein klar over kvar namnet Lid kjem frå, er det eit absolutt like viktig namn å ta vare på som Opedal. Og det er jo mellomnamn eg vil skaffa meg, ikkje eit heilt namnebyte.

I går hadde eg ei oppleving av å endeleg få sett fingeren på noko som lenge har vore eit vagt, uargumenterbart prinsipp i hovudet mitt.
Noreg er på fleire måtar eit depressivt land å leva i for oss konservative, passeleg miljøbevisste kristne hardingar. Det er mykje det stendig går ad undas med her i landet. Dialektane sig sakte, men sikkert i grus. Me har opplevd ei kyrkjelydsskilsmisse og to. Det vert stadig varmare vintrar og underlegare vêr; ingen veit heilt kvifor. Dei kristne er splitta, og talet på dei i Noreg har vore på veg nedover sidan åttitalet. Folk vert latare, tjukkare og har ikkje behov for Gud. Fråflyttinga aukar, og med byane kjem forureininga.

Og så vidare. Dette er konklusjonar det er lett å lesa seg til med litt statistikk og nøytrale aviser. Noreg som heilskap er i endring, og mykje ved denne endringa er ikkje godt nytt.
Men den trassige sida i meg nektar å la seg kua av deprimerande statistikk om norske skrivekunnskapar. For eg vil ikkje gløyma motkulturane!

I går, etter ei ganske strabasiøs ferd med ein motvillig koffert, fekk eg kvila meg litt hjå min faste vert Anne Brit, Normisjonarbeidaren i Bodø. Det er noko underleg med denne bustaden. Eg slappar alltid godt av der, og er freista til å kvila middag kvar gong eg er innom. Ho fortalde om Impuls, ungdomsarrangementet til Imikirken i Stavanger. Kor det har vokse dei siste åra! Det byrja med Impuls i Stavanger, heldt fram med Impuls i Trondheim, deretter kom Studentimpuls i Oslo, og no planleggjer dei to Impuls-helger i Bergen og Tromsø.
Det hadde gått meg hus forbi. Eg har vore litt for oppteken med kor fælt det er å vera kristen her i landet.

For å ta eit anna døme: aukt global oppvarming. Det er aukt global oppverming som er problemet. Jordkloten er faktisk heilt avhengig av drivhuseffekten for å ikkje frysa folk i hel, men folk får jo heitetokter av berre ordet. Aftenposten.no har ein ganske ofte brukt link som heiter "Se hvor fort polene smelter!" Greitt nok, men kva skal me så gjera med den tileigna kunnskapen vår? Prøva å rekna ut kor lenge me har att?
Ja, det vert varmare og varmare her i verda. Men eg trur ikkje me lett kan vera ein motkultur, viss me ikkje aktivt oppsøkjer og jaktar etter motkulturane.


Eg seier ikkje at "ignorance is bliss." Men når temperaturen i verda generelt er på hell og bror vender seg frå bror, kan me ikkje gløyma å leita etter dagar som denne!